唔好忘記玩！— 夏天不只是放假咁簡單

一到暑假，家長們就忙於安排興趣班、夏令營、補習課程，務求讓子女過一個「有意義」嘅暑假。但喺忙碌之中，我哋往往忽略咗一樣極之重要嘅事——玩。

而且，唔係淨係細路先需要玩。由初生嬰兒伸手捉腳趾，到成年人一齊玩 board game 笑到流眼水，人類一生都需要玩。玩唔只係娛樂，更係我哋腦部、情緒、同社交發展嘅基本需要，等同食飯、瞓覺、愛一樣咁重要。

缺乏玩樂會點？

心理學上叫做「遊戲剝奪（Play Deprivation）」，即係長期冇足夠自由同開心嘅玩樂時間。研究發現，缺乏玩樂會影響解難能力、情緒調節、同人際適應能力。

曾經有一位犯下嚴重罪行嘅人士，佢細個成長階段幾乎冇得玩。冇透過遊戲學習處理壓力、建立關係，最終釀成悲劇。呢個真實例子提醒我哋：玩唔係奢侈品，係必需品。

玩，係腦部發展嘅「開關」

神經科學研究發現，玩會激活大腦唔同區域：

• 小腦（Cerebellum）：負責動作協調，會喺身體活動遊戲時被激活；

• 前額葉皮層（Prefrontal Cortex）：幫助記憶、判斷力、解難，喺創意或社交遊戲中被啟動；

• 好奇心與探索精神：喺遊戲中被引發，促進學習同自我成長。

  
  

甚至老鼠都會玩！有實驗發現，有得玩嘅老鼠可以喺壓力後快速恢復適應環境，冇得玩嘅老鼠就會驚到唔敢郁。人都一樣——玩得多，適應力更強，更容易喺逆境中走出嚟。

遊戲的多種形態

唔同年齡、唔同人，都有唔同形式嘅遊戲：

• 身體遊戲：奔跑、跳舞、身體接觸

• 物件遊戲：動手玩積木、砌拼圖

• 社交遊戲：講故事、角色扮演、互動

• 想像遊戲：幻想世界、創作劇情

  
  

由父母同BB玩捉迷藏，到青少年水戰, 大笑，每個遊戲都建立信任、加強關係、啟動腦部成長。

一個真實故事：遊戲打開心扉的大門

喺我嘅治療工作中，我最近遇到一位青少年，佢情緒激動、充滿防備，完全唔願意傾偈。傳統的談話式心理治療對佢冇用——佢完全拒絕參與。

直到我加入咗遊戲治療元素，例如一齊玩遊戲、畫畫、用互動活動建立關係，奇蹟發生了——佢開始放下戒心，開始願意分享佢喺家庭中嘅掙扎。慢慢地，佢由對抗變成信任，我哋之間亦建立起真正嘅聯繫。

呢次經歷再次提醒我：遊戲唔只係玩樂，佢係一種療癒嘅語言，特別喺講唔出口嘅時候。

這個暑假，俾孩子時間去玩！

夏令營、興趣班當然好，但請記住：自由、無壓力嘅玩樂時間同樣重要。後園探險、玩角色扮演、畫畫、發白日夢——都唔係浪費時間，而係創意、自信、快樂成長嘅根源。

唔好忘記你自己——大人都需要玩。去散步、聽音樂、講笑話、玩Board Game，都係身心健康嘅一部分。

結論

玩樂對於每個人來說都至關重要。無論年齡大小，玩都能促進我們的心理健康和社交能力。這個暑假，讓我們一起重拾玩樂的樂趣，讓生活變得更加充實和快樂。

關於作者

任永康 (Ryan)，心理學博士

美國加州註冊教育心理學家 (LEP4497)和雙重思維心理學的創始人。任博士專注於過動症治療、執行功能技能發展以及兒童和青少年的文化敏感護理。